السلام عليكم ورحمه الله وبركاته واهلا وسهلا ومرحبا فيك بنشره ومقال جدييييد فرش طازجه طالع من الفرن لعيونك
عارف والله مقصر، وساحب، ولعلي قاعد أُخلّ بقيم براند الدافور
لكن اللي اقدر اقوله لك هذ المره باشرت وبديت بمنظومه نمو لي واخييييرا 🎉
كنت اسويها للعملاء لكن خلاص سويتها لي
وبيني وبينك ما سويتها كذا عشان استمر بس، لكن لقيت سوق جديد فيه فرص ذهبي، فقررت ابدأ تحدي جديد بحساب جديد ونشوف وين اوصل هناك
على كل حال نرجع لموضوعنا
الرقم اللي تدخله بالشهر وانا عارف انه متذبذب ، وترا عادي شي طبيعي، لكن اللي مهو طبيعي انك ما تكون عارف كيف جا بالضبط، ومنت عارف حدوده
بس مو هذا موضوعي الان
عشان تكسر سقف دخلك الفتره اللي راحت لازم تشتغل على قسمين، قسم متعلق بـ قيمك وروتينك، وقسم متعلق بنفس الشغل
حاشرح الاول باختصار، الثاني حنلعب لعب فيه
ركز
طيب الاول لازم تدرك انك كـ خبير او مستشار او مدرب، شغلك الاساسي انك تشتغل مع عملاء سواء شركات او افراد او حكومات
هذا العميل هدفك توصله من نقطه الى نقطه، لكن يكون تحول جذري
الكارثه ويييين ؟؟!
يوم يكون كل تفكيرك وشغلك الشاغل انك تجيب عملاء اكثر !
وهنا لازم اوضح نقطه
موضوع انك تجيب عملاء اكثر مهو غلط، ولا انك تفكر فيه شي غلط، لكن الغلط انه ياخذ الوقت الاكثر من يومك
ومع مخالطة خبراء اكثر اقولها لك، كحد اقصى ساعة واحده فقط يوميا للتسويق !!
الباقي لشغلك وحياتك الشخصية بعيدا عن الشغل اصلا !
طيب كيف تصير هذ الحياه الوردي اللي تتكلم عنها يالدافور
هنا بصراحه اقولها لك (((( لازم تبني نظاااااااام ))))
النظام فكرته باختصار، شي متكرر يكون مبني على دراسات وتكرار انماط، هدفه الاساسي يقلل الجهد ويحقق نتائج متضاعفه وفي نمو مستمر، والنمو اصلا له ابعاد كثيره
سواء بنيت هذا النظام مع خبير مختص او لحالك
الاهم يكون عندك نظام بحيث خلاص ساعه يوميا اتابع النظام التسويقي حقي بعدها شغل مع عملاء والباقي راحه واستمتع بحياتي
الان اروح معك للقسم الثاني
الشغل نفسه اللي انت تقدمه
وهنا ابغاك تحط نقطه وجمله بعقلك
بدون مخاطرة ما حتشوف الارقام الكبيره
اعيدها مره ثانيه ؟
بدون مخاطرة مفيييش ارقام كبير
مفيييش كسر سقف دخل ولا حيط ولا شي
حلو الكلام ؟
اعتقد لا 😅
لكن تعال افهمك ليه ؟
لاننا عشان نوقع عقد بمبلغ كبير من 10 الاف ريال وانت طالع، طبعا نوصل 20,30k ريال وفوق
هنا في محورين اساسية :-
1. القيمه المتبادله 2. والمخاطره المنتهية من طرف العميل
يعني انت لازم تقدم قيمه بمنظور العميل اضعاف المبلغ اللي حيدفعه
وركز على فكره، القيمه لازم يشوفها كاستثمار وليس دفع مبلغ مقابل خدمه
والمخاطره المنتهيه، انه ما يشوفها مخاطره ابدا
تبغى مثال ؟
حعطيك مثال انا شغال عليه الان لاحد عملائى ببناء منظومه نمو
بالاساس كان يبيع خدمه تصميم موقع الكتروني + استراتيجية محتوى + كتابه محتوى
كان ياخذ بالاصل 4500 ريال مقابلها، وبالصعب يغلق عقد او يسكر
طيب يوم بدينا ببناء منظومه النمو ودرست السوق، بشكل صريح السوق يقول “ محد مهتم لاستراتيجيتك ولا موقعك ”
انا بغاك توعدين خلال اول 3 شهور مثلا تجيب لي 10 استشارات
والله حتبني موقع حتبني استراتيجية ما يهم
هنا اختلف التفكير، وفعلا بنينا عرض بيعي مدروس جديد
شمل 7 بنود اغلق الصفقه بعدها مباشره بـ 7500 ريال
والان نزبط نظام تسويقي متكرر له
انا مني جاي اقول لك اني قوي وانها سهله، لا بصراحه
انت لازم تدرس سوق وتحلل وتطلع بعرض وتحول يتناسب اصلا معك وبعدها تبنيه بهيكله عروض ومنها لصفحات هبوط واستراتيجية محتوى وتبدأ تحلل وتتحكم وتطور وتحسن
اللي ابغاك تطلع منه بهذا المقال امرين
بدون مخاطره مفيش ارقام كبيره
وابغاك تختار المخاطره اللي حتلعب عليها
وممكن في تساؤل تفكر فيه
كيف اقدم وعد لعميل وانا مني ضامن النجاح ؟؟
ابشرك الان اجهز فيديو حينزل باليوتيوب لهذا الموضوع تحت عنوان بناء استراتيجية تحول، معرف متى حينزل، لكن اتوقع حتشوفه فجأه قدامك بإكس او هنا بالنشره
الان خذ قرار مباشره، وابدأ، وقف تسويف، وقف تأخير، صدقني انت المستفيد وصدقني حلمك واهدافك تستاااااهل .
